ՀՀ Կենտրոնական ընտրական հանձնաժողովը հաստատել է հունիսի 7-ի ընտրությունների ժամանակացույցը, որի համաձայն նախընտրական քարոզչության պաշտոնական ժամանակահատվածը սկսվում է մայիսի 8-ին։ Սակայն Նիկոլ Փաշինյանը և «Քաղաքացիական պայմանագիր» (ՔՊ) կուսակցությունը իրենց քարոզարշավը սկսել են երկու ամիս առաջ՝ այս ամսվա սկզբից։
Այս գործողությունը իրավաբանների և քաղաքական շատ գործիչների կողմից համարվում է օրենքի կոպտագույն խախտում։ Սակայն խնդիրը միայն դրա սկիզբն է։ Իրականում, այս «ներկուսակցական այցերի» ընթացքում բոլորը տեսնում են վարչական ռեսուրսի հստակ և բացահայտ չարաշահում, որը զուգահեռվում է վարչապետի լիազորությունների վերազանցման և չարաշահման հետ։
Օրինակներն անհամաչափ են։ Փաշինյանը հանձնարարում է կոնկրետ անձի չնշանակել մանկապարտեզի վարիչ, ինչը դուրս է գալիս նրա վարչապետական լիազորությունների շրջանակից։ Նա «դաբրո» է տալիս խոշորացված համայնքի ղեկավարին՝ բնակավայրի ղեկավար նշանակելու, ինչը նույնպես իր իրավասությունների մեջ չի մտնում։ Այս ամենի հետ մեկտեղ նա տարաբնույթ խոստումներ է տալիս՝ իբրև վարչապետ։
Այս հակասությունները հարցեր են առաջացնում։ Եթե այս այցերը պետք է լինեին ներկուսակցական, ապա ինչո՞ւ են դրանք իրականացվում վարչապետի պաշտոնական «կոստյումով»։ Եթե դրանք պարզապես ներկուսակցական հանդիպումներ են, ապա ինչո՞ւ են կազմակերպվում այլ քաղաքացիների հետ՝ նույնպես վարչապետական կերպարով։ Եթե վարչապետը պաշտոնական այցեր է կատարում մարզեր, ապա ինչո՞ւ է դա կատարվում հենց այս պահին, կամ՝ ինչո՞ւ է այն ծածկվում «ներկուսակցական քարոզչության» քողի ներքո՝ 50 ՔՊ-ականների ուղեկցությամբ։
Այս ամենը վկայում է մի բանի մասին՝ Նիկոլ Փաշինյանը բուն ընտրարշավի պաշտոնական մեկնարկից երկու ամիս առաջ դուրս է եկել քարոզարշավի։ Ընդ որում, այս գործողությունը ապահովվում է ոստիկանական ուժերի, պետական մարմինների, ՏԻՄ-երի աշխատակիցների և անձնակազմերի ներգրավմամբ։
Այսպիսով, եթե այլ քաղաքական ուժեր ևս դուրս գան «ներկուսակցական քարոզչության», ապա իրավապահներն ու պետական մարմինները նույն կերպ կաջակցե՞ն, թե՞ հակառակը՝ կդադարեցնեն այն։
Ի դեպ, նշենք, որ որոշ բնակավայրերում փողոցներում արդեն կախված են ՔՊ-ի քարոզչական պաստառները։ Թե ինչ գումարներով, ում հաշվին, և առավել ևս՝ ինչու, դեռ կանդրադառնանք։
