Այսօր Հայաստանի վարչապետ Նիկոլ Փաշինյանը ընդունել է NVIDIA ընկերության փոխնախագահ Ռև Լեբարեդյանին։ Զրույցի ընթացքում քննարկվել են մի շարք կարևոր հարցեր, որոնք առնչվում են Հայաստանում տեխնոլոգիական ոլորտի զարգացմանը։
Հիմնական թեմա դարձել է Firebird ընկերության կողմից Հայաստանում արհեստական բանականության (ԱԲ) գործարան և տվյալների կենտրոն կառուցելու նախագծի իրականացման ընթացքը։ Ռև Լեբարեդյանը հայտնել է, որ կենտրոնի կառուցման աշխատանքները շարունակվում են։ Կողմերը կարևորել են NVIDIA ընկերության արտադրած բարձր ցիկլային ցուցանիշներով չիպերի հերթական խմբաքանակի արտահանման թույլտվությունների արագ և անխափան տրամադրումը։
Վարչապետը և NVIDIA-ի ներկայացուցիչը նաև անդրադարձել են Հայաստանում տեխնոլոգիական ոլորտի հետագա զարգացմանը և պետական կառավարման համակարգում արդյունավետության բարձրացման նպատակով արհեստական բանականության ներդրման հնարավորություններին։ Նիկոլ Փաշինյանը նշել է, որ այս գործընթացում կարևոր է մասնավոր հատվածի կողմից աջակցության ապահովումը։
Այնուհետև Ռև Լեբարեդյանը ներկայացրել է Հայաստանում տեխնոլոգիաների ոլորտում կրթական ծրագիր իրականացնելու նախագիծը։ Վարչապետը ողջունել է այս նախաձեռնությունը՝ որպես տեխնոլոգիական կադրերի պատրաստման կարևոր քայլ և հայտնել Կառավարության ամբողջական աջակցությունը դրա կյանքի կոչելու գործում։
