ՀՀ Պաշտպանության նախարարի տեղակալ Արման Սարգսյանը Ժնևում մասնակցել է «Անվտանգության ոլորտի կառավարման և վերահսկողության խթանումը Հայաստանում» խորագրով միջոցառմանը։ Այս միջոցառումը կազմակերպել էր Անվտանգության ոլորտի կառավարման ժնևյան կենտրոնը (DCAF)։
Միջոցառման հիմնական նպատակն էր խորացնել փոխըմբռնումն ու համագործակցությունը՝ կենտրոնանալով անվտանգության և պաշտպանության ոլորտում կառավարման, զինված ուժերում մարդու իրավունքների և հիմնարար ազատությունների պաշտպանության, մարդու իրավունքների վերաբերյալ կրթության և ժողովրդավարական վերահսկողության ոլորտներում։
Քննարկումների ընթացքում մասնակիցները փորձում էին համահունչ դարձնել իրենց գործունեությունը միջազգային նորմերին, արժեքներին և լավագույն փորձին։ Հանդիպման ընթացքում քննարկվել են Հայաստանի անվտանգության ոլորտում ընթացող բարեփոխումներին վերաբերող հարցեր, ինչպես նաև ներկայացվել է մի շարք երկրների լավագույն փորձն այդ բնագավառում։
