Հունվարի 13-ին ՀՀ Պաշտպանության նախարար Սուրեն Պապիկյանը հայտարարեց մի քայլ, որը, նրա խոսքով, ուղղված էր լուծելու հանրային, ոչ թե անձնական խնդիր։ Նա հորդորեց և իր որոշմամբ ազատեց աշխատանքից Պաշտպանության նախարարության համակարգում գտնվող բոլոր այն ծնողներին, որոնք ունեն այլ երկրի քաղաքացիություն ունեցող զավակներ։ Պապիկյանը խնդիրը դիտարկում է որպես ազգային անվտանգության հարց և խնդրում է լրատվամիջոցներին օգնել այս հարցում։
Այս հայտարարության ֆոնին մեր թերթը որոշեց ուսումնասիրել իշխող «Քաղաքացիական պայմանագիր» կուսակցության վարչության 20 հոգանոց կազմը։ Ուսումնասիրության արդյունքում պարզվեց, որ վարչության 20 անդամներից 5-ը կանայք են, իսկ 15 տղամարդկանցից 8-ը չեն անցել պարտադիր զինվորական ծառայություն։
Այս փաստը ստեղծում է պարադոքսային իրավիճակ։ Իշխանության քաղաքական վերնախավը, որը պետք է ծառայի որպես օրինակ, իր գործողություններով և անգործությամբ ստեղծում է լուրջ խնդիրներ պատասխանատվության և ազգային անվտանգության հարցերում։ Պարտադիր զինվորական ծառայությունից խուսափելը, որը համարվում է հայրենիքի հանդեպ պարտքի կատարում, այժմ դառնում է իշխանական վերնախավի անդամների համար ոչ թե անձնական, այլ հանրային խնդիր։
Սուրեն Պապիկյանի կողմից իր ենթականերին ազատելուց հետո, կարևոր է, որ նաև Կուսակցության վերնախավին պարտադրի հրաժարականներ ներկայացնել՝ հայրենիքի հանդեպ անպատասխանատու պահվածք դրսևորելու և բանակից փախչելու համար։
