Մայիսի 10-ին ավարտվեց բուհական ընդունելության հայտագրման գործընթացը, որի արդյունքները, ինչպես նախորդ տարիներին, այս տարի ևս ցույց են տալիս անհանգստություն առաջացնող միտում՝ հատկապես Հայաստանի ազգային ագրարային համալսարանի դեպքում։
Արդեն երեք տարի է՝ ԿԳՄՍ նախարարությունը և համալսարանի ռեկտոր Հրաչյա Զաքոյանը հայտարարում են, թե գերակա ագրարային մասնագիտությունների համար բարձր կրթաթոշակ սահմանելը փրկում է համալսարանը։ Սակայն այս քայլը, փաստորեն, չի ունեցել ակնկալվող ազդեցությունը։
Այս տարի ագրարային ոլորտի 14 գերակա մասնագիտությունների ցանկին դիմել է ընդամենը 68 դիմորդ՝ անցած տարվա 98-ի դիմաց։ Եթե հաշվի առնենք վերջին տարիների փորձը, որի համաձայն ագրարային համալսարանի դիմորդների շուրջ 70-80 տոկոսը չի հաղթահարում ընդունելության նվազագույն շեմը, ապա կարելի է ենթադրել, որ վերջնականում համալսարան կընդունվի ընդամենը 15-20 ուսանող։
Այս անհանգստացնող իրավիճակը ագրարային համալսարանում շարունակվում է 2021 թվականից, երբ ռեկտորն էր Վարդան Ուռուտյանը։ Նրա կողմից ստեղծված «լավագույն» ավանդույթները, անցումային կերպով, շարունակում է ներկայիս ռեկտոր Հրաչյա Զաքոյանը։
