ՀՀ Ազգային Ժողովի «Հայաստան» խմբակցության պատգամավորների խումբը դեկտեմբերի 23-ին հանդիպում է կայացրել Հայաստանում Շվեդիայի դեսպան Եվա Սունդքվիսթի, Նիդերլանդների դեսպան Մարիկե Մոնրոյ-Վինթերի եւ Բելգիայի դեսպան Էրիկ Դե Մույնքի հետ։
Հանդիպման ընթացքում խմբակցության պատգամավորներ՝ Սեյրան Օհանյանը, Աննա Գրիգորյանը, Արթուր Խաչատրյանը, Արմեն Գեւորգյանը եւ Քրիստինե Վարդանյանը, հյուրերի խնդրանքով ներկայացրել են իրենց տեսակետները Հայաստանում տիրող ներքաղաքական իրավիճակի վերաբերյալ։
Խոսակցությունների ընթացքում անդրադարձ է կատարվել Հայաստան-Եվրամիություն համագործակցության հնարավորությունների եւ դատաիրավական բարեփոխումների իրականացման գործում ԵՄ-ի աջակցության կարեւորությանը։
Պատգամավորները նաեւ բարձրաձայնել են մի քանի հրատապ հարցեր։ Առաջինը՝ Ադրբեջանում պահվող հայկական անձանց վերադարձի հարցն է։ Երկրորդը՝ Ղարաբաղում հայկական մշակութային ժառանգության պահպանության խնդիրն է։ Խմբակցության անդամները նաեւ մտահոգություն են հայտնել, ըստ իրենց գնահատականի, Հայաստանում ընթացող ժողովրդավարական հետընթացի վերաբերյալ։ Բացի այդ, քննարկվել է Ադրբեջանի հետ խաղաղության հաստատման հնարավոր երաշխիքների մասին։
