Իմ Լեհաստանի Հանրապետությունում կատարած պաշտոնական այցի շրջանակում, Վարշավայում տեղի է ունեցել հանդիպում Լեհաստանի հայ համայնքի ներկայացուցիչների հետ։
Հանդիպման ընթացքում ես ներկայացրեցի այս այցի հիմնական նպատակները և ակնկալիքները՝ ընդգծելով Հայաստանի և Լեհաստանի միջև հարաբերությունների զարգացման և երկկողմ համագործակցության ամրապնդման կարևորությունը։
Ես խոսեցի Հայաստանի Հանրապետության կառավարության առաջնահերթությունների մասին՝ կենտրոնանալով երեք հիմնական ուղղության վրա։ Առաջինը՝ խաղաղության օրակարգի ակտիվ առաջմղումն է, որը նպատակ ունի ապահովել երկարատև խաղաղություն և կայունություն մեր տարածաշրջանում։ Երկրորդը՝ տարածաշրջանային հաղորդակցության ուղիների ապաշրջափակման գործընթացն է, որը կարևոր դեր է խաղում տարածաշրջանի տնտեսական զարգացման և մարդկային կապերի ամրապնդման համար։ Երրորդը՝ Հայաստանի տնտեսական զարգացման համար իրականացվող համապարփակ բարեփոխումներն ու նորարարական քայլերն են։
Այս համատեքստում ես նաև անդրադարձեցի «Իրական Հայաստան» գաղափարախոսությանը՝ ներկայացնելով դրա հիմնական սկզբունքները, որոնք ուղղված են երկրի ներքին ամրապնդմանը, ժողովրդի կյանքի որակի բարելավմանը և մեր երկրի դիրքի ամրապնդմանը միջազգային ասպարեզում։
Հանդիպման վերջում ես պատասխանեցի ներկաների բազմաթիվ հարցերին, որոնք ընդգրկում էին Լեհաստանի հետ հնարավոր համագործակցության ոլորտները, Ադրբեջանի հետ խաղաղության գործընթացի ընթացքը, Հայաստանի արտաքին քաղաքականության առաջնահերթությունները և մեր երկրի զարգացման ընդհանուր հեռանկարները։
