Հունվարի 13-ին ես, Ներքին գործերի նախարար Արփինե Սարգսյանը, ընդունել եմ Հայաստանում ԱՄՆ արտակարգ և լիազոր դեսպան Քրիստինա Քվինին, ով ավարտում է իր դիվանագիտական առաքելությունը մեր երկրում։
Հանդիպման ընթացքում ես բարձր եմ գնահատել դեսպան Քվինի հետևողական ջանքերը Հայաստան-ԱՄՆ հարաբերությունների զարգացման գործում։ Նրա ներդրումն այդ ոլորտում անժխտելի է։ Ես ընդգծել եմ, որ դեսպան Քվինի պաշտոնավարման ընթացքում երկկողմ հարաբերությունները հասել են ռազմավարական մակարդակի։
Մենք կարևորել ենք ձևավորված արդյունավետ համագործակցությունը։ Վերջին տարիներին համատեղ ջանքերով կյանքի են կոչվել Ներքին գործերի նախարարության բարեփոխումների օրակարգի մի շարք կարևոր ծրագրեր։
Դեսպան Քրիստինա Քվինը շնորհակալություն է հայտնել ինձ և նախարարության թիմին արդյունավետ ու կառուցողական համագործակցության համար։ Նա բարձր է գնահատել համատեղ իրականացված ծրագրերը, ինչպես նաև մի շարք հանցագործությունների բացահայտման ուղղությամբ ակտիվ փոխգործակցությունը։
Մենք մտքեր ենք փոխանակել TRIPP նախագծի իրականացման, նախարարության հետ գծագրված առաջիկա ծրագրերի իրացման, ինչպես նաև երկուստեք հետաքրքրություն ներկայացնող այլ հարցերի շուրջ։
Հանդիպման ավարտին ես մաղթել եմ դեսպանին նորանոր հաջողություններ՝ ընդգծելով, որ նա մշտապես կմնա Հայաստանի բարեկամը։
