Հայաստանի Հանրապետության արտաքին գործերի նախարար Արարատ Միրզոյանը աշխատանքային այցի շրջանակում հանդիպում է ունեցել Շվեյցարիայի Համադաշնության փոխնախագահ, արտաքին հարաբերությունների դաշնային դեպարտամենտի ղեկավար Իգնասիո Կասիսի հետ։
Հանդիպումը տեղի է ունեցել Բեռնում՝ Դաշնային խորհրդի պաշտոնական ընդունելությունների տանը՝ աշխատանքային ճաշի ձևաչափով, որտեղ Իգնասիո Կասիսը հյուրընկալել է իր հայ գործընկերոջը։
Հանդիպման ընթացքում երկու նախարարները մտքեր են փոխանակել Հարավային Կովկասում և Մերձավոր Արևելքում ընթացող իրադարձությունների շուրջ։
Արարատ Միրզոյանը բարձր է գնահատել Շվեյցարիայի կողմից ցուցաբերվող աջակցությունը՝ ինչպես Հայաստանում ժողովրդավարական ինստիտուտների ամրապնդման գործընթացում, այնպես էլ հումանիտար ոլորտում, մասնավորապես՝ Ղարաբաղից տեղահանված փախստականների կարիքների հասցեագրման հարցում։
Հայաստանի և Շվեյցարիայի արտաքին գործերի նախարարները նաև քննարկել են փոխադարձ հետաքրքրություն ներկայացնող այլ հարցեր։
